ევროკავშირი აცხადებს, რომ ტრამპის მუქარის შემთხვევაში საპასუხო ნაბიჯებს „სწრაფად გადადგამს“ ბრიუსელსა და ვაშინგტონს შორის ტონი მკაცრდება. ევროკავშირმა განაცხადა, რომ დაუყოვნებლივ უპასუხებს დონალდ ტრამპს, თუ ის ახალი საბაჟო ტარიფების დაწესების მუქარას შეასრულებს.
აშშ-ის პრეზიდენტის სამიზნე ის ევროპული ქვეყნებია, რომლებიც ციფრული სერვისების დაბეგვრას გეგმავენ. აღნიშნული დაპირისპირება ატლანტის ოკეანის ორ მხარეს შორის სავაჭრო ომის ესკალაციის საფრთხეს ქმნის. დონალდ ტრამპი მიიჩნევს, რომ ციფრული გადასახადი ამერიკულ ტექნოლოგიურ გიგანტებს არათანაბარ პირობებში აყენებს.
საპასუხოდ, იგი ევროპულ პროდუქციაზე ტარიფების 100%-მდე გაზრდით იმუქრება, რაც სერიოზულ წნეხს უქმნის როგორც ევროპულ დედაქალაქებს, ისე ევროკომისიას. ბრიუსელი მკაფიო პოზიციას აფიქსირებს. ევროკომისიის სპიკერმა ამერიკული მხარის წნეხს გაუმართლებელი უწოდა. „ლეგიტიმური პოლიტიკის წინააღმდეგ მიმართული ცალმხრივი ზომები გაუმართლებელია“, - განაცხადა მან და ხაზი გაუსვა ევროკავშირის მზადყოფნას, დაიცვას საკუთარი ეკონომიკური სუვერენიტეტი.
ამერიკული საბაჟო ტარიფების ამოქმედებამ, შესაძლოა, ევროპის მხრიდან მყისიერი კონტრზომები და სავაჭრო ომის განახლება გამოიწვიოს. ამ ეტაპზე ციფრულ დაბეგვრასა და საერთაშორისო ვაჭრობის სტაბილურობას შორის ბალანსი უაღრესად მყიფეა.